مناجاة بس مو بالفصيح..!
عبدالامير الركابي.
اجيبك من سكون الليل
واحجيلك
واصير وياك راس براس
لمن تشهد على ايامي
وعلى الوسواس
شكص عالي جبير
وعتبتك تنباس
………
اجيبك من سويده الكلب
واكلك احسب الانفاس
واوديلك نذرجاري
ويه جاري الماي
واحطك فوك روس الناس
………
اجيبك من بكايا السهر
عسن ترضه وماترضه
تمر والمشيتك حراس
وانا عيني عليك
ودوم اسيسلك
كرب وشموع تضوي وطاس
…………
اجيبك من ضلوع القهر
وادوفك بين دمعي
وبين جفني
ياحرم محروس ماينداس
يابرعم جوري مندي
لاينشم ولاينجاس
………..
اجيبك من سنين الضيم
يوم بيوم
وانت الستر والمتراس
شهد ومكتر وممنوع
حاضر والليالي دموع
بحر ومااله مقياس
………….
اجيبك من مرار الآخ
واصيحن صيحة مئيس
دخيلك يابو الغيره وبس
واشوفك من ورا البيبان
تشع جنك صبح ووذان
تفك الباب لو للباب الف ترباس
……………
اجيبك من حلاة الروح
واصيحن صيحة المذبوح
يادم يفور ماله يباس
يانار وثافيه وكانون
ياهمة ربع من يمشون
ياكان بقدرته ويكون
يعم عالعامه ورياس
…………
اجيبك من ورا المافات
عزيز وردته جيات
جزاتك من تصد لاباس
يريتك تبري الذمة
ويريتك تقبل اللمه
ويريتك تسمح بضمه
ويريت ترابك نشمه
ونظل اخماسنا باسداس
2020-10-22
بواسطة عبدالامير الركابي
تعليق واحد
تتميز قصيدة المناجاة بالعامية هذه…
بطول النفس وطول البال والإصرار على الإفصاح والنداء بصوت مسموع ( اجيبك ) كفواصل ما بين المقطوعات الثمانية من القصيدة … ثم وبصوت خافت اقرب الى الهمس يخاطب طيف الغائب الذي يدنو تارةً وينأى تارةً … بين الغياب والعودة والبعد والقرب وفي كل الاحوال …
كما لو انه يخاطب شخصًا موجودًا بالفعل … لإيصال عاطفة قوية مرهفة عميقة…
فهو الموصوف والمقصود… وهو الذات والموضوع …
يحاكيه بادق صور ومعاني خواليج النفس والروح
فاطمة تقي