سالوفه علعمرمن مقطعين!
عبدالامير الركابي.
ـ1 ـ
مافاتني
غرب ومر ولمني
ومن شافني
ملت و عليه توسدت
العمر شال وحطني
خالف علي ممشاي
كال اللي تريده هواي
خفف خفف وحط الصوت علبهداي
كال السواليف محسوبات
زهوه وطفوله
ويامَسرَع الايام والساعات
لحظة وكهوله
ومَكّضِيّه بالروحات والجيات
ولو حسبت تالي التحاسيب طايحات
ما هدني
جلب وانا في عهدة الجبحات
مايستعان بشي مكضي
يركض ركض مايلحكه ركضي
وهو موش اني اللي ركب حظي
ياسامعين الصوت
لاتصدكون بالنيات
مااطوله
مااكصره
لمن يمد مدي
ـ 2 ـ
عد السنين وشافها تعدي
ونلحكهه مجبورين
مرة نتضاحك مرة تبجي العين
مره نشوف الوكت طوّل
ومرة الوكت ماتلحكه العين
ياهو العرف سر الزمن
لو مشيته ليوين
بعّد علي المهد
صرت اهجس بلحدي
بين المهد واللحد خط مستقيم
ماكو انحرافات
ممنوع التقاطع بالخطوط
مشي العمر مشي الشطوط
والشط مجبور لازم باخره يبدي
2020-07-24
بواسطة عبدالامير الركابي