(عرس ….واويه )..خلونه نضحك شويه !عزيز الدفاعي

بعيدا عن لغه التحليل السياسي والفصحى والقهر )
عزيز الدفاعي
حجي خليف كان عنده ولد وحيد اسمه هويدي معوق وفوكاه مسودن دوخه من هو صغير وكبر وصار شاب وحس انه لازم يزوجه لانه كام يتحارش بالرايحه والجايه والليل كله يسوي اشياء تخدش الحياء !!!بس محد تقبل بي من نسوان السلف لانه قبل سنين عقدله على بنيه يتيمه دفع لاهله مهر غالي وثاني يوم العرس هربت من الديره
وظلت الوادم تضحك وتسولف بعرس الواويه مال هويدي وخليف .
شافه المله بالمضيف دايخ وجكاره يروث وره الثانيه كاله شبيك طويل العمر خير
سولفله قضيه ابنه المسودن وحيرته محد كاعد ينطي مره وهو يريد حفيد يحمل اسم العائله والعشيره علمود ينسون يصيحوله ابو هويدي المسودن
صفن المعمم وكاله محلوله حجي خليف باذن الله واهل البيت
… كاله :مولانا ابوس راسك … جو ايدك بنيه بت حلال
ضحك المومن وكله موجوده بت سنيه الخبازه ؟؟؟
خليف هز ايده وضحك وكله :هاي هم مسودنه وهم زغيره كلش وابوه حرامي؟؟؟
المله كله :على اساس ابنك هم يوسف زمانه ما كو غير هاي العروس تقبل والناس راح تفرح وتصفق وتجي للعرس بس عدنه مشكله صغيره
كله خليف: شني مولانه ؟؟
كله: لازم نطلع شهاده صحيه للعريس والعروس تظهر انه هم عقال علمود نسجل عقد الزواج وهاي شويه تكلف
وافق حجي خليف ودفع للمله الي طلع الاوراق بالرشوه وصارت الملجه والعرس على ايد المله الي قرا على راس العريسين دعاء عجيب غريب علمود الخلفه والذريه العاقله
وجتي الناس تهني خليف ومرته ويدعولهم (بالولد الصالح ) الي يشيل اسم العائله المصون بين العربان
وره سنين ومراجعه اطباء بالولايه ونذور حبلت مرت هويدي المعوقه بقدره قادر وحجي خليف ومرته يحلمون بفد حفيد طول وعرض وعقل يركب على الفرس ويفتر بنص السلف والناس تهاب قوته وعقله من يكعد بصدر المضيف ويرفع راسهم بين الناس بلكت يعوض سنين طويله السلف كله يضحك على هويدي المسودن وتركض وراه الزعاطيط وتصفك
السلف اغلبه صدك انه اذا المله المعمم قرا على هدويدي المنغولي الدعاء مالته راح مرت هويدي تجيب طفل عبقري ومابي شي ويشيل راس اهله ويطلع سر مهر اصلي !!!!
وره سبع تشهر مو تسعه جابت مرت هويدي طفل يشبه الابو والام خلقيا وعقليا ما ينعرف خشمه من اذانه ولا يسمع ولا يتاثر باي صوت استغفر الله ودوه للطبيب كاللهم العوض على الله هذا امتحان من رب العالمين
راح خليف على المومن الحيال وهد علي بالمكوار كله :شيخنا هاي مرت هويدي جابت طفل استغفر الله طينه هم معوق وانت كلتلي راح تقر على هويدي ومرته علمود تجيب طفل مابي مرض وعاقل ليش هيج سويت بي ؟؟؟
الروزخون الحيال كله :اولا هذا امر الله سبحانه وتعالى مو بيدي
والثاني :اوراق الصحه مزوره
والثالث :من يعرس مسودن على مسودنه شتريد يجيبون عمي شعلان ابو الجون لو كلكامش ؟؟؟
طبعا منغولي يا خليف !!!!!!
ولا سالفه الي انتظروا( الكابينه )السحريه الي راح تحل مشاكل العراق العظيم بعد انتخابات مزوره ومافيات سمت نفسه احزاب ونظام طائفي سياسي قادته وقياداته تموت من غير تسلم وزاره علمود ( تخدم الشعب مو )؟؟؟
لا والمصيبه 36 الف عراقي هم النخبه العلميه صدكوا وره خديعه 15 سنه من الضحك على الذقون والنهب والفساد والاحتلال …سالفه الترشيح الالكتروني وظلوا يحلمون بمناصب وزاريه بحكومه السيد عبد المهدي لصاحبها السي ……!!!!
لعبه المومن صح !!!!!
وصدق دحدوحه في مقولته الخالده ( الك ونه )