جلجامش لوكالباندا!‏كامل الزيدي

جلجامش لوكالباندا!
‏كامل الزيدي.
التحولات الارتدادية اللي عملها السادات بعد موت ناصر ما كانتش مشكلتها في الشخص تحديدا.. بمعنى التحول حصل مش بسبب السادات شخصيا.. لكن بسبب قوة الشريحة الاجتماعية اللي كان بيمثلها السادات واللي تقريبا كانت ماسكة مفاصل البلد… ما كانش حد في دولاب الدولة من الموظفين الكبار في الجهاز الإداري و العسكري وطبقة كبار الملاك العقاريين وحتى أصحاب الملكيات المتوسطة في الريف وأصحاب المشاريع الصناعية والخدمية من القطاع الخاص ولا حتى تجار الجملة كان له مصلحة في استمرار اجراءات ناصر الاشتراكية والشعبية وبطبيعة الحال كانو رافضين اي خطوة على سبيل تعميق الإجراءات دي اكتر من كده. وحركات التململ من سياسات ناصر بدأت في اواسط الستينات مش بعد موته لا ده وهو عايش.. ده كمان نمو الطبقة دي وتعاظم قوتها الاقتصادية والسياسية حصل في عهده ومن ثغرات المنظومة بتاعته… فالسادات مش هو السبب لكن هو كان عنده الشجاعة انه ينقلب على تراث ناصر.. يعني هو قائد الثورة المضادة اللي كانت القوى الاجتماعية المعبرة عنها موجودة فعليا بما يعني انه ما خلقهاش من عدم… لكن مع فرض وجود قيادة بديلة حبت انها تكمل مشروع ناصر وتصلح اخطاؤه وتسد ثغراته وتعمق الإجراءات الشعبية والاشتراكية.. كان حيبقى قدامها معركة شرسة لتصيفة كل جيوب الثورة المضادة في جهاز الدولة وخارجها وكان حيبقى عليها تخوض معركة دموية لتأميمات أعمق وأشمل وتغيرات تؤدي لتمكين الطبقات الشعبية من السلطة ومواجهات عنيفة ضد التراث الثقافي والاجتماعي المتخلف وحصيلة المواجهات دي حتبق معركة في غاية الشراسة زي الثورة الثقافية في الصين كده.. المعركة دي كانت حتبقى محتاجة انه ينظم جبهة شعبية من القوى التقدمية واللي كانت في الوقت ده تم اضعافها وانهكها تماما تحت سمع وبصر زعيم الثورة الاسبق … اما لو كان استمر ع الحال بدون تغيير كان حيعتمد على قوة كاريزمته وتحالفاته داخل اجهزه الدولة ويلعب على توازن القوى ويمشي ع الحبل زي البهلوان فوق حفرة النار . لكن ده ما كانش حل لأنه كل اللي حيقدمه هو مجرد تأخيير لهجوم القوى الرجعية المضاد
‎2021-‎09-‎05