موارب…!
عبدالامير الركابي.
موارب
لاهو مَفتوحٍ ولامردود
أكِصْدَه وارد ليه ردود
إذا تكصّدتَهْ ماأوصل
واذا رديت مااندل
أفتحه هواي مايقبل
واسده يصيح مايقفل
احط الناس كلها شهود
موارب
لاهو مبعد لاهو للمعنى يتكارب
جنه شمس اللي اتغارب
جنه حظي وماحظيت
جنه لو صدته وخطيت
وجنه حدي ومانويت
وجني تايه مالكيت
والدرب مرسوم علكد
موارب
مثل باب وماهو باب
مثل عطشان وسراب
مثل نسمه محيره
ومثل جلمه مبعثره
يكول مو هسة تره
وينكر الصار وجره
والشهور يعدهه عد
موارب
ومحطوط بجيوبه الوكت
جني يمه لاإجيت ولارحت
ساعة يضحكلي واشوفنه انفتح
وساعه يظلم ويصير اكبر وكح
لاهو جارحني ولامضمد جرح
واني انطر وآكل بلايه ملح
والشهر شهرين ويزيد العدد
موارب
ومغرب ولايترك بصيص
والذي ينطره يظل بحيص بيص
لاهو برحي ولاهو زهدي ولاهو شيص
وحتى مو جمري وتحوشه من العثك
لاهو مر ولاهوعلكم لادبك
ولاصحيب ولاحبيب ولارفك
تكول صدته ولنه من إيدك زُبك
ولو زبك يرجع عليك ويشبكك
واليدور يدور مامنه مفيد
هذا الموارب
ابو طرز الجديد
ذاك الموارب
فلا أدري شيريد
2020-11-09
بواسطة عبدالامير الركابي