جنت اسأل عليك..!
عبدالامير الركابي.
جنت اسأل عليك 
أمس جنت اسال عليك 
ومر علي خيالك 
كتله بلكي تروح يمه 
ويجي هو بدالك 
امس شعلت الشموع 
ولملمت طرف الدموع 
وشلت همي وخاطري 
وشفت جني ماشفت 
بس خذلني ناظري 
ومااجيت بالك 
امس غافلت الوكت 
وعبّرت جمعه وسبت 
وانتجيت وماطحت 
جني اتكاوه وعليل 
ومر علي اخر الليل 
واني اتربالك 
امس تعبني البجي 
ونمت وفراشي حجي 
ساعه اكوم وارتجي 
وساعه اترجه الزمان 
كافي محنه وامتحان 
ويكفي ظل هلالك 
امس جذبت على همي  
ورحت يمك واني يمي 
وغلبطت باسمك واسمي 
ومر علي كل عجيب  
واصرخ ومامن مجيب 
وانت ياهنيالك 
امس كربت السراب 
وامطرت جني سحاب 
وفات من يمي شهاب 
وكتله بلكي تشوفه 
حتى لو بالكوفه  
اجي وتعنالك 
‎2020-‎08-‎02