الثكيل…!
عبدالامير الركابي.  
ياثكيل   
كلي ياساعه تميل   
الوكت مل وصاح منك  
وانت ممدود وطويل  
فحطتني امشي على مشيك  
وانتجي مابيه حيل   
ساعة اصب وساعه بدي   
وساعه افرش على كدي   
ونوبه اجيب ونوبه اودي  
وانت فواح وتهيل   
ياثكيل العمر راح  
واني بس اطلب سماح  
صرت مربوط براح  
جني طير وماله ليل   
ياثكيل افسح مجال   
بلكي نعبر للخيال    
شلنه بالقالت وقال  
ونظرتك تشفي العليل  
ياثكيل اني وحيد  
وانته يمي مو بعيد  
لو تريد شما تريد  
الحجر بيدك يسيل  
ياثكيل ارضه علي   
واني اروبلك المي   
واخلط الشمس على فَيْ   
وانت حمّل وانه اشيل   
ياثكيل الرايحات   
كلت ترجع ماتبات  
تالي ضيعت البنات  
وعفتهن وانت الدليل  
ياثكيل شمايصير  
اني كاعد علحصير  
ناطرك مالي مصير  
غير نارك والجحيل   
ياثكيل   
‎2020-‎04-‎05