على شنو انتخابات جديدة سيد؟

صائب خليل

الانتخابات.. شراح تجيب؟ غير نواب؟ زين مو انت محتقر النواب والبرلمان؟ مو انت الغيت كل نتائج الانتخابات اللي قلت عنها انها كانت “نزيهة وطردت الفاسدين”، والغيت كل ما حصلوه ناخبيك بجهودهم من مقاعد، “بكصكوصة” ولا رف إلك رمش؟ مو دزيت عصابة احتلت البرلمان حتى بقية النواب ما يكدرون يجتمعون؟ زين الناس اللي انتخبت هذولة النواب، ليش راح تطلع تنتخب مرة ثانية وره ما شافوا نوابهم انعلسوا بعصابة؟ منو يگول ما راح تعلس نوابهم الجدد بنفس العصابة؟

وحتى ربعك اللي انتخبوا نوابك.. على شنو يطلعون ويتعبون نفسهم؟ شمدريهم ما راح تسويلهم كعدة وداع وتسحبهم من البرلمان الجديد مثل الطليان مثلما سحبتهم قبل كم يوم، ومحد افتهم ليش؟

على شنو العراقي يطلع ينتخب ويگعد ينتظر رحمتك، ميدري ترضى عن البرلمان الجديد لو هم تطك كويلاتك وتلغيه؟

زين صدك، ليش ما تعين نواب المجلس بمعرفتك وحكمتك اللي محد يفتهمها، وتوفر على شعبك العراقي التعبان، التعب والمصاريف؟

أنت عينهم وقسمهم: نصهم معارضة ونصهم حكومة “ابوية” تسوي “إصلاح”، وابوك الله يرحمه.

بعد على شنو الانتخابات، سيد؟

4 آب 2022